Alkalan Kotun Koli ne za su yanke hukunci kan Atiku, Obi ga Tinubu
Kotun kolin Najeriya ta kafa wani kwamiti mai mambobi bakwai domin sauraron karar da Atiku Abubakar, Peter Obi da Chichi Ojei suka shigar.
Mutanen uku, ‘yan takarar shugaban kasa na jam’iyyar Peoples Democratic Party (PDP), Labour Party (LP), da Allied Peoples Movement (APM), suna kalubalantar sakamakon zaben shugaban kasa da aka gudanar a ranar 25 ga watan Fabrairu.
KARANTA WANNAN LABARIN:Mijina, Surukana, Suna Bani Takaici Saboda Ban Samu Haihuwa Ba, Matar Aure Na Neman Saki
Sanarwar kotun da Zainab M. Garba ta sanya wa hannu a ofishin magatakardar, ta ce bisa ga doka ta 2 doka ta 1 (2) ta Kotun Koli ta 1985 da aka yi wa kwaskwarima, ana ganin sanarwar ta isa ga bangarorin.
Kamar yadda bayanin da ke cikin sanarwar ya nuna, jerin sunayen mambobin kwamitin da za su zauna kan kararrakin sun hada da alkalai Musa Dattijo Muhammad, Uwani Musa Abba Aji, Lawal Garba, Helen M. Ogunwumiju, I.N. Saulawa, Tijjani Abubakar da Emmanuel Agim.
A halin da ake ciki, kotun kolin ta kuma sanya ranar Litinin 23 ga watan Oktoba domin sauraren karar da Atiku ya shigar, na neman kawo sabbin hujjojin da ke tabbatar da cewa shugaban kasa Bola Tinubu ya mika takardar bogi ga hukumar zabe ta kasa mai zaman kanta.
